樂印姊妹 示愛要「大聲講佢知」

30

組合樂印姊妹(SIS)成軍已有四年,由《巨聲》出身、現為無綫娛樂新聞台主播的駱胤鳴,和大兩年、任樂理老師的家姐駱胤樺組成。

樂印給人的感覺一直都充滿正能量、小清新、文青,其實樂印姊妹也有情歌,好似《愛phone了》和《520》等都是開心情歌。新歌《大聲講我知》不減「樂印味道」,更慫恿大家,要愛就要大聲講佢知!

駱胤樺:紅

駱胤嗚:藍

新歌《大聲講我知》是首輕快、清新、易上口的情歌,姐姐駱胤樺和妹妹駱胤嗚的聲音各有特色,合拍的和音唱出女孩子的心聲,「鍾意咪講囉!」
「新歌idea係來自,好多時香港哋嘅男仔都唔夠膽表白,要考慮好多先敢開口,例如係自己身家、有無車有無樓,同埋對方會唔會介意同自己一齊捱。所以首歌係想鼓勵返佢哋,愛要愛得及時,表白係講求勇氣,對方未必會介意你無啲咩,反而可能會欣賞你有表白嘅勇氣呢!」

「我都可以大大聲咁講俾大家知我唔介意向男朋友求婚㗎,兩個人一齊邊個做主動都無所謂!」

新歌MV找來科林做導演,娘娘杜小喬做女主角,人強馬壯的班底,原來樂印兩姊妹的社交圈子都幾有份量喎!
「今次再搵科林做導演,本來係睇中佢追女仔有一手,諗住佢可以教下MV男主角點樣追女主角,點知佢話要男主角再傻更更啲先至青春,純愛啲。不過科哥哥拍野我地係好有信心嘅。同埋同佢開會果陣,佢又會好似以前咁無啦啦靜咗,唔識佢嘅人會以為佢係發呆、唔知飄到去邊,不過識得佢耐就知道佢真係諗緊野。至於娘娘,真心感激佢拔刀相助,因為我地MV改左期幾次,差啲搵唔切女主角,臨時臨急搵佢佢都一口答應,仲表演得好專業,同一條路無論行幾次佢都無怨言,聽講科林仲大讚佢演得好好,好多鏡頭都一take過!」

與妹妹駱胤嗚組成樂印姊妹做歌手,但正職是位樂理老師的姐姐駱胤樺,到底是如何兼顧兩份同樣熱愛的工作?面對學生、上課期間應該有不少趣事發生吧!


「的確歌手嘅生活係多姿多采,但我覺得除左同學生建立常規,其他嘅課程點樣教其實都係取決於自己,一個叻嘅老師要將課程變有趣,知識變生動;而做咗歌手反而令我喺教授音樂知識上更加有說服力,因為我哋嘅歌都貼近生活,又貼近年輕人嘅興趣。
記得第一次代課,我無同校長講我教書以外嘅工作,第一日返學全校已經起哄,攪到校長小息時要了解吓我。佢叫我唔好同學生講太多娛樂圈嘅嘢,都唔好同傳媒講我教邊間學校,但係網絡實在太發達喇,同學仔都ADD咗我嘅社交平台。我覺得咁樣反而幾好,更加容易用正能量感染佢哋,臨走前有一班更加唱我哋首《謝謝你》多謝我,好感動。」


妹妹駱胤嗚09年參加〈超級巨星1〉後已經加入娛樂圈,9年來不斷創作新曲新詞,《如果我是個男孩子》和《森林》更在網上獲得極高點擊率!
「我自己梗係期望可以寫多啲好聽嘅歌俾大家聽啦,不過樂迷都好重要。我試過寫過一首歌俾人話係垃圾歌,又試過俾人話抄歌,但係即使俾人打沈過幾次都好,都好想好好寫返首自己喜歡唱又唱得開心嘅歌。當然都好希望公司可以多啲支援,出多幾首歌,爭取到樂壇頒獎禮嘅入場卷。下一個合作目標係Tonick,因為覺得佢哋嘅音樂好特別好好玩。」

Comments

comments