與《創世紀》一起成長 郭晉安做奸商首富

45

99年的劇集《創世紀》,由羅嘉良、郭晉安和陳錦鴻飾演的葉榮添、馬志強、許文彪,絕對是電視劇中的經典人物,早前深夜重播,仍然吸引到一班觀眾捱更抵夜都要煲埋先瞓!

事隔19年,《再創世紀》的主題故事圍繞近十年香港金融經濟發展,除了郭晉安繼續留守之外,當年三劍俠的角色已換成林文龍、周柏豪和鄧佩儀,難怪安仔笑說︰「我當年個角色已經被人做咗啦!」事隔19年,想不到無綫會再開拍《創世紀》系列,《再創世紀》拍攝期長達半年,花了一億港元製作,絕對是精心泡製的作品。

故事已跟《創世紀》沒有關係,但無綫依然找來郭晉安來演第一男主角,令觀眾更容易投入《再創世紀》。安仔笑說:「我好榮幸同劇集一齊經歷成長嘅階段,但就一定做唔番馬志強嘅感覺!反而周柏豪好有當年羅嘉良嘅味道。」

我做唔番馬志強

劇中飾演香港首富的安仔野心好大,想由普通商人成為香港首富,再爬升到世界首富地位,當中壞事做盡,最終應有此報成為通輯犯!《再》劇由無綫、愛奇藝和中國廣播影視出版社合作拍攝,拍攝期長達半年,花了一億港元製作,安仔邊聽邊點頭說:「我可以講《再創世紀》裡面,有好多錢真係用咗喺啲好真實嘅場景裡面,例如我同楊怡有一場婚禮,面對嗰場婚禮,我哋覺得有真實嘅感覺,拍得住我哋結婚時嗰種氣氛。枱面上啲小禮物有晒,所有嘅酒都係真正紅酒,唔係提子汁,連backdrop啲相都精心設計,作為一個演員,如果幕後能夠做到咁樣,我哋都會互相尊重,各自攞最好嘅嘢出嚟。」

因楊怡多咗皺紋
曾經在《末代御醫》與楊怡合作過,默契早已建立,《再》劇中楊怡與安仔飾演夫妻,安仔稱,再與楊怡合作,不但覺得很合拍,又笑言拍完劇打算去整容,「因為今次同楊怡拍檔好開心,成日笑,笑到口都大埋,面上又多咗皺紋!」53歲的安仔面上皺紋不算多,而且身型fit到爆,原來一齊在於運動和飲食。「其實我哋一家真係好健康,健康到有時唔好意思請人嚟屋企食飯,因為我哋食到好淡,以蔬菜為主,菜我哋唔落鹽又唔落油,真係劈嚿薑落去,烚熟就食。所以好怕人哋話『你畀啲咩我食呀?』我又會帶小朋友去行山,有時由清水灣行去將軍澳,就易啲,行飛鵝山就棘啲。」

對獎項無欲無求

安仔已獲三屆視帝,對於獎項已無欲無求,「好奇怪,攞完第一次,我覺得夠,吐氣揚眉嘞,覺得直頭退休都得,但做到咁上下又覺得,唔係喎!我只係呢套攞視帝啫,有啲戲未做到代表作,到第二次攞,又係阿旺,我都覺得有啲問題,我唔做阿旺係咪代表我唔可以喺其他戲有認同呢?遇到Amy(監製王心慰),佢問我可唔可以做反派?我話你認為我得我咪去做囉,佢又話:『但我要你做人哋唔會覺得你係反派嘅反派。』我覺得好得意,就做咗《與敵同行》,但係好唔成熟,覺得可以拿捏好啲。前兩年嘅《忠奸人》,今次唔同嘞,因為我已經拿捏到。角色發揮得淋漓盡致,做到活生生嘅人物,滿足感就喺呢度,比起要攞獎,更大動力。」

投資物業身家厚


安仔入行超過30年,多年來他主力投資買「磚頭」,目前他手上持有多個物業,有傳總值逾7000萬港元,不過他不打算將物業留給仔女他認為仔女要靠自己努力!

02年憑《戇夫成龍》爆紅,收入大增,這時他已經開始為自己的退休生活好好部署,他將賺到的錢儲起,然後投資買物業,買完一間又一間,雖然他不肯透露現時手上持有多少物業,但肯定下半世無憂。他算過60歲前,可以供完手上的物業,到時一對仔女應該完成大學,他可以選擇不拍戲,隨意轉型做其他工作。

「最好喺我死之前用晒啲錢,我唔會將物業留畀仔女,佢哋有知識,生活唔成問題嘅!我同個仔講,我哋係基督徒,所有嘢來自天父,走時要還畀教會。」兒子令山非常明白事理,欣然接受爸爸為他安排的一切。

Comments

comments