張衛健講心唔講金 還觀眾《大帥哥》

234

「YO!取西經!使乜驚啊!」、「噼啪你個隆的咚!」、「型到跌渣!」,仲有「我係如來佛祖玉皇大帝觀音菩薩指定取西經特派使者花果山水濂洞美猴王齊天大聖孫悟空。」無論你生於那個年代,相信你總有聽過張衛健(Dicky)拍劇時的口頭彈!

相隔22年,張衛健回巢無綫,領軍洪永城、蔡思貝、曹永廉及楊秀惠等主演《大帥哥》,劇集選用輕鬆幽默的手法講軍閥年代,形式新穎,而且節奏簡單易明,相當迎合觀眾對喜劇的口味。張衛健式搞笑,大家終於等到啦!

張衛健(Dicky),一個對香港人熟悉得來又陌生的名字。1996年,張衛健為無綫拍完《西遊記》後即離開娘家北上發展,一去就去了22個年頭。

6

還觀眾一部劇

「好多人問我點解會回歸?第一,我要還恩情;第二,當年離開香港,離開無綫,感覺同香港同埋廣東話地區嘅觀眾不辭而別,有句說話一直擺喺心底,『想還香港同埋廣東話地區觀眾一部劇』,不過咁多年嚟不斷簽唔同公司、經理人,根本無辦法。直到近五、六年有工作自主權後,我就開始不斷諗起呢件事,喺呢個時候,珍姐(曾勵珍)搵我食飯。」

珍姐的說話,讓他認真考慮回港拍劇一事,這次他接拍劇集純粹隨心出發,享受為主。「近兩年祈禱,我希望上帝幫我實現一件事,就係翻開人生新嘅一章。當年我19歲參加歌唱比賽成為歌手,到加入TVB學做戲、爭取做男主角、劇集開始hit,繼而喺台灣出咗第一張國語唱片、返香港拍《西遊記》再離開TVB開發唔同市場,我一直將心神放喺演藝事業,計算劇集出嚟效果點樣。由我答應拍《大帥哥》開始,我決定拋開呢種觀念,用另一個態度去演戲,唔再計算,隨心而行。」

5

張衛健式搞笑

拍攝前健仔抽空接受身體檢查,需要留院一晚準備,留院期間發現醫院播着無綫節目。「如果我拍嘅劇集能夠為病人帶嚟一個鐘頭嘅快樂,忘記病痛,咁好好喎!如果我嘅作品能紓緩大家沉重嘅工作、學業壓力,正正係回應上帝俾我演喜劇、創作喜劇嘅天賦。」

雖然有網友指他「吃老本」,但亦有大部分觀眾認為這就是張衛健獨有的演繹方式,是「張衛健式搞笑」,而且他所演出的風格相當配合劇情,明顯有研究過對白,更有網友表示這種演法其實相當難演,演得差就會讓人尷尬。

4

金句要漁翁撒網

重返娘家,雖然沒有熟悉的演員在身邊,但健仔沒有不習慣,「識得曹永廉,但冇正式合作過,不過最開心佢哋信任我,佢哋會叫我幫手度對白。大佬呀!其實我自己嗰啲都未搞掂㗎!但係佢哋信我咪齊齊度囉!」說到度橋,健仔今次由劇集主題到劇名都有份創作,「劇本都係由編劇寫番,我度啲細位,配合現場情況。不過金句一定要有,曹永廉仲話使唔使漁翁撒網落咁多?我試過喺出面拍劇,續個時段同我計收視,我唔會放過每個機會,或者呢次觀眾咁啱攞起咗個電話睇唔到呢!」

健仔早前特意抽空返港出席《大》劇宣傳,他在台上感性地表示不捨得,「開機前我已經好唔捨得呢套劇,開拍前我問自己,下次張衛健用全廣東話拍劇會係幾時呢?我答唔到自己,可能係明年,可能係never again,所以當時已經有啲唔捨得香港嘅觀眾」。身邊的珍姐聽到即說:「唔使講喇,你想幾時拍,我就幾時開啦!」

兩位姨太賺唔少

三姨太蔡思貝自言拍《大》劇賺了不少,因為難得在香港的電視看到健仔演出,更可以跟他互動和學習,已是最大的得着:「佢將每場戲都變成重頭戲咁拍,真係令我大開眼界。最難忘係可以同健仔一場跳海戲同埋感情戲,我哋仲會kiss架,真係令到我心入面留低好多美好嘅烙印!」對於《大》劇未能成為台慶劇,蔡思貝覺得無所謂,學「大帥哥」話齋,所有事情都安排好,只要劇集好,何時播出都無所謂。

楊秀惠在《大》劇中飾演健仔的二姨太,風情萬種的她首場即與健仔對戲展現出女人味一面,引出健仔在《西遊記》中的經典對白:「Yo!打妖精之嘛,使乜驚呀!」令觀眾印象深刻。今次秀惠參與演出壓力絕對不輕,為此她要熟讀對白,拍攝時落足萬二分精神去接戲,導致原本要增磅的她,最後仍敵不過壓力比拍攝前更瘦,幸好出來效果劇組都收貨:「最開心係健仔俾咗好多劇本裡面無嘅反應我,越拍越有火花,之前劇集嘅性感畫面俾到我好大啟發,今次性感同搞笑都比之前有更多嘗試。」雖然秀惠對自己表現有少少失望,但已盡力拍了一套好的劇集,希望大家喜歡。

Comments

comments