Logout一直在尋找 Login音樂市場的密碼

20

成日蒲上水石湖墟的樂隊bass手范文浩 Logout,是本地樂隊FreshLife成員之一,擔任bass手,又是音樂製作人,作曲及編曲均難不倒他,但要在音樂界突圍,不容易,路是漫長!接受我們EC Day 訪問,他想筆者用廣東話寫成訪問稿,因為他亦是一個廣東歌fans。好! 就如實筆錄,雖然老編未必喜歡,就當做向廣東歌給一個敬禮吧!

回想第一次夾band,係2010年喺浸會大學讀大專嘅時候,Logout 話嗰陣淨係識彈幾個chord,覺得夾band好有型。而佢細細個就聽廣東歌,Beyond當然是偶像。夾band初期又流行樂隊文化,嗰時MR.同RubberBand最為人知。小記問,一頭栽進這行,以佢既背景,是否有點兒冒險?佢回答,又唔好話係深入虎穴,雖然話條路會好難行好辛苦,但因為自己好鍾意舞台,好鍾意表演,好鍾意音樂,所以透過左樂隊去表達自己。而結果最後亦喺2017年組成了現時的樂隊FreshLife,正式以樂隊為職業。

喺唔同嘅地方演出,因為場地嘅結構不一,所以佢認為tune聲係最大嘅困難,始終唔係好多地方可以喺演出前有sound check,變相佢哋要靠即時嘅反應去調整樂器,例如聲量嘅配合同埋樂器嘅EQ。

而另一個困難嘅地方,就係場地對樂隊嘅容納啦,因為係好多人眼中,樂隊永遠都係好嘈吵,變咗有好多搞手都未必夠膽搵樂隊演出,就算搵咗你演出,都會喺現場用盡一切方法去減低聲量,怕其他商店或者住客會投訴。

Logout本身除咗樂隊之外,同時係一位幕後製作人,工作會涉及作曲、編曲、錄音和監製。係呢一行入面,佢希望可以一直創作更多廣東歌,香港人可以好似八九十年代時般喜愛聽本地音樂。佢補充,成就唔敢講要好偉大好成功,只是希望音樂人可以真係用音樂成為維持生計嘅行業同埋終身職業。

喺呢10年裏面,因為互聯網嘅發展令好多音樂都可以喺網上平台免費給人下載。坦白講,收入的確因此下降了,冇人再去買碟,演唱會冇人買飛,變相音樂製作成本都下降了,然後聽眾覺得唔好聽‵……其實只是一個惡性循環。我問他擔唔擔心?佢話唔擔心都係呃你嘅,但相信好嘅音樂始終會有人識欣賞,所以幾困難都好,佢同隊band都盡量堅持做好音樂嘅質素,為求有一日音樂圈可以更興旺起來,樂隊可以有更多演出機會。小記亦祝福佢日後可以衝出重圍,在樂壇發熱發亮!

最後,小記請Logout介紹一個地方俾讀者去。他就答,石湖墟喇!因為石湖墟係一個商店集中地,亦有好多唔同既食肆,鄰近也有數個商場,方便唔同類型嘅讀者。

另外,石湖墟一個好特別嘅地方,就係每一條街名都係以”新”字做開頭,並取健康、成功等等之意,例如:新豐路、新健街、新康街等等。范文浩Logout的好介紹,你又覺得如何?

Comments

comments